OL-rógvararnir leggja síðstu hond á fyrireikingarnar

Tveir føroyskir rógvarar eru við í danska hópinum, sum í morgin fer á venjingarlegu í Portugal.

Royndi miðvingurin, Sverri Sandberg Nielsen, hevur roynt slíkt fyrr, men fyri Sáru Maria Johansen, sum er við á danska 'áttaranum', er hetta ókent og spennandi.

 - Hetta er tað, sum flestu íðkarar á høgum stigi droyma um. So hetta er veruliga at liva í dreyminum, sigur Sára Maria Johansen, sum saman við bátsfeløgunum róði seg til OL-plássið í mai.

20240627-150319-l-3472x2312ma.jpg

Rógvararnir vera í Portugal til 23. juli, tá ferðalagið fer víðari til París. Ólavsøkudag skal áttarin rógva fyrsta innleiðandi umfarið.

 - Vit fara at brúka hesar vikurnar upp á at rætta tann síðsta teknikkin, fínpussa smálutirnar og fáa enn meir ferð á bátin, greiðir Sára Maria Johansen frá. Hon er kend úr føroyska róðrarumhvørvinum og seinni vann hon heimsmeistaraheitið í inniróðri á 2000 metrum.

Í november gjørdist hon partur av áttaranum, sum nú ger seg til reiðar til leikirnar.

 - Vit brúka nógva tíð upp á venjing og venja hart, men eg royni eisini at njóta hvørt sekund av tí, tá eg veit, hvat endamálið er. Tað er ein serstakur felagsskapur, eg eri blivin partur av, og vit merkja hvønn dag, hvussu stórt hetta veruliga er.

20240627-170427-l-7930x5287ma.jpg