Articon ger vindmyllulundina í Húsahaga

Byggifelagið Articon fekk arbeiðið at gera vegir og annað jørðarbeiði í vindmyllulundini hjá SEV í Húsahaga í Suðurstreymi. SEV fekk fimm tilboð upp á arbeiðið. Articon hevði lægsta tilboðið og ger arbeiðið fyri 10 mió. kr. Arbeiðið at gera økið byggibúgvið skal vera liðugt fyrst í mai næsta ár, tá tær 13 myllurnar skulu setast upp.

Arbeiðið at seta myllurnar upp tekur tveir mánaðir. Síðani verða tær royndar, og so tiknar í brúk næsta heyst. Vindorkan verður næstan trífaldað, tá vindmyllulundin í Húsahaga er liðug, upplýsir SEV. Í dag fáast tíggju prosent av streyminum frá vindi.

60 prosent varandi orkukeldur

Tá myllurnar í Húsahaga verða knýttar í elnetið, fer vindorkan upp í 26 prosent. Vatnorkan er 35 prosent, so um eitt ár koma 60 prosent av streyminum, sum SEV ger, frá varandi orkukeldum.

30.september skrivaði SEV undir sáttmála við týsku fyritøkuna ENERCON um at byggja og seta upp 13 vindmyllur í Húsahaga. Myllurnar kosta 85 mió. kr. Tær eru sama slag sum myllurnar hjá SEV í Neshaga.