Íleggingargrunnurin á føroyskar hendur á nýggjárinum

Ríkislógartilmælið um at lata føroysku myndugleikunum Íleggingargrunnin er nú lagt fyri løgtingið.

Íleggingargrunnurin hevur verið danskur síðani stovnan í 1964. Nú verður mælt til at seta inn í donsku lógina fyri grunnin eina nýggja grein-1a, sum stutt og greitt sigur at "Fonden overdrages til de færøske myndigheder."

Lógarbroytingin skal koma í gildi 1. januar 2025.

Hóast Íleggingargrunnurin formliga er danskur, so hevur landsstýrið valt stýrið fyri grunnin síðani 1976, tá hann eisini fekk heimstað í Føroyum.

Fulla ábyrgd 

Við yvirtøkuni fáa føroyskir myndugleikar fulla ábyrgd av grunninum, eisini fíggjarligu ábyrgdina. Føroyskir myndugleikar gera tá av, hvussu grunnurin verður skipaður, og hvussu peningurin í grunninum verður brúktur.

Íleggingargrunnurin varð upprunaliga stovnaður til at veita fígging til íløgur í undirstøðukervið í Føroyum.

Ognirnar í grunninum eru í dag umleið 700 milliónir krónur. 

Nýggj farstøð og Suðuroyartunnil

Tá løgmaður og forsætisráðharrin í januar skrivaðu undir semjuskjal um at Íleggingargrunnurin skal á føroyskar hendur, segði Aksel V. Johannesen, at hann ætlaði at helvtin av fænum í grunninum skal brúkast til nýggja farstøð í Vága Floghavn og hin helvtin skal setast av til møguligan Suðuroyartunnil. Hann segði í sama viðfangi, at tað kravdi politiska undirtøku í løgtinginum.

Í uppskotinum til ríkislógartilmæli, sum nú er lagt fyri løgtingið, verður einki sagt um, hvat pengarnir í grunninum skulu brúkast til.