Gongur væl hjá danska Rockwool í Russlandi

Hálvt triðja ár er liðið, síðani Russland gjørdi innrás í Ukraina.  

Eftir innrásina tóku nógvar fyritøkur seg úr Russlandi, men danska milliardafyritøkan, Rockwool, tók avgerð um at halda á við virkseminum í landinum.  

Nú vísa tøl fyri fyrra hálvár í ár, at fyritøkan hevur havt góðan fíggjarligan byr.

Russisk søla heldur á

Danski bjálvingarrisin framleiðir og selur vørur um allan heimin, og síðani 1999 hevur fyritøkan verið virkin í Russlandi. 

Í økinum í Eysturevropa, sum Russland hoyrir til, hevur sølan fyrra hálvar verið 374 milliónir evrur, sum er ein vøkstur uppá 25 prosent. 

Samlaða sølan í heiminum er hækkað átta prosent síðani somu tíð í fjør, ella 1,9 milliardir krónur.  

Nýggi roknskapurin vísir, at sølan í Eysturevropa er 19 prosent af samlaðu søluni hjá Rockwool. 

Avgerðin er illa dámd

Fíggjarliga hevur tað verið ein góð avgerð hjá Rockwool at verða verandi á russiska marknaðinum, men avgerðin hevur ikki verið væl dámd av øllum.

Í november bleiv Rockwool sett á ein svartlista av ukrainskum mynduleikum, sum stríðast móti mutri. Men í donsku bjálvingsarfyritøkuni heldur mann ikki, at tað hevði gjørt mun at tikið seg úr Russlandi.

Um tey góvust við søluni, høvdu onnur tikið við, verja tey í Rockwool seg við sambært Berlingske, sum vísir til Ritzau. 

Í roknskapinum ger Rockwool vart við, at fyritøkan letur 13,4 milliónir evrur, umleið 100 milliónir krónur, í ein grunn, sum arbeiðir við at byggja Ukraina uppaftur.