Hálv millión fólk flýggja í Libanon

Umleið ein hálv millión fólk flýggja undan ísrealsku álopunum á Libanon.

Tað metir flóttafólkastovnurin hjá ST, UNHCR, sum kallar tað fyri eina humanitera vanlukku, skrivar danska kringvarpið

Seinastu dagarnar eru í minsta lagi 350.000 libanesar flýddir í egnum landi, og harafturat eru 130.000 libanesar og sýrar, sum búgva í Libanon, flýddir til Sýria. 

Sambært libanesisku myndugleikunum eru umleið 1,2 milliónir fólk flýdd undan álopunum.

Libanon og flóttafólk

(Mynd: Reuters/Ritzau Scanpix)

Fingu einki við sær

- Tað er ein humaniter vanlukka. Nógv flóttafólk eru til gongu og eru rýmd heimanífrá uttan at hava tikið nakað við sær, sigur Andreas Fløistrup, kunningarstarvsfólk hjá UNHCR, við morgunsendingina hjá P1.

- Vit samstarva við libanesisku myndugleikarnar og royna at fáa teimum tak yvir høvdið í onkrum skúla ella onkrum øðrum almennum bygningi. Men nógv liggja eisini úti á berajóli, tí tað er ikki pláss fyri teimum nakrastaðni, leggur Andreas Fløistrup afturat.

Annars hevur Houti-felagsskapurin í Yemen váttað, at hann í nátt hevur sent dronur inn í ísraelska býin Tel Aviv.

Sambært ísrealska herinum eydnaðist tað at verja seg fyri loftálopunum.