Ísrael heitir á fólk í Suðurlibanon um at flýggja

Ísraelska verjan, IDF, heitir á íbúgvar í 20 bygdum í Suðurlibanon um at rýma alt fyri eitt.

IDF sigur í fráboðanini:

- Virksemið hjá Hezbollah tvingar IDF til at svara aftur við hørðum. IDF hevur ongar ætlanir um at raka teg, men tú mást fara heimaífrá alt fyri eitt fyri at vera trygg, og far norður um Awali-ánna. Bjargið lívinum hjá tykkum, skrivar Avichay Adraee, talsfólk fyri IDF á miðlinum X, fyrrverandi Twitter.

- Øll, sum eru nærindis Hezbollah-eindum, støðum og útgerð, eru í lívsvanda. Eitt og hvørt hús, sum Hezbollah brúkar til hernaðarligan tørv, verður eitt mál, skrivar Adraee.

Meira enn ein millión fólk í økinum eru rikin frá húsi og heimi, eftir at ísraelsku álopini  fyri nøkrum vikum síðani eru vorðin alsamt tittari, siga libanskir myndugleikar.

Ein vegur, sum er nýttur sum flýggingarleið úr Libanon til Sýria, er stongdur eftir álop í morgun.