Nations League: Avgerandi stig á Tórsvølli

Teir eru rættiliga avgjørdir undan Nations League-heimadystunum ímóti Armenia og Lettlandi.

 - Seks stig her á Tórsvølli, sum er okkara borg, sum skal vera okkara borg. Tað er tað, sum vit fara eftir, ja, sigur Bárður á Reynatrøð, og Jóannes Bjartalíð tekur undir við liðfelaganum.

 - Vit hava tveir heimadystir, so vit hopa sjálvandi upp á seks stig, tað gera vit, sigur Fredrikstad-miðvallarin.

Aftur á vøllinum

Jóannes Bjartalíð er aftur á vøllinum og aftur í landsliðshópinum eftir eitt skaðadarvað kappingarár uttan nakran landsdyst.

 - Tað er sjálvandi heilt fantastiskt at vera á vøllinum aftur og spæla fótbólt. Tað er sjálvandi tað, tú vilt sum fótbóltsspælari, sigur hann, men ásannar samstundis, at hann ikki er í toppformi enn.

 - Eg eri ikki har, sum eg kann vera men útfrá umstøðunum, eri eg væl fyri og byrji at líkjast einum fótbóltsspælara aftur.

Støðan er nøkulunda hin sama hjá liðfelaganum úr Fredrikstad, Brandi Hendriksson Olsen, og tí er ilt at siga, hvussu stóran leiklut teir fáa. 

 - Tá tú kemur aftur frá skaða, veitst tú ikki, hvussu kroppurin reagera upp á venjingarnar, so tekur tað dag fyri dag. Men higartil gongur alt væl og kroppurin hevur tað gott. So alt kann henda, sigur Jóannes Bjartalíð.

Hørð kapping um málmansplássið

Ivi er eisini um málmansplássið. Hvørki Mathias Heðinsson Lamhauge ella Teitur Matras Gestsson vóru við ímóti Norðurmakedónia og Lettlandi í september, og tí stóð Bárður á Reynatrøð millum stengurnar.

Hesa ferð eru allir tríggir við.

 - Vit kalla okkum "GK union" og vit hava tað gott saman, men vit vita, hvat tað inniber at vera málverji. Tað er ein, sum spælir, og tveir sum sita uttanfyri, sigur Bárður á Reynatrøð, sum ætlar sær at varðveita plássið, hóast kappingin er hørð.

 - Eg haldi ikki, at eg havi spælt meg av yvirhøvur, men eg veit, at hinir báðir hava gjørt tað gott, tá teir hava fingið kjansin. So tað má venjarin um, og eg eri klárur, um tað skuldi verið, sigur málverjin hjá Víkingi.

Føroyar spæla ímóti Armenia hóskvøldið og Lettlandi sunnudagin. Báðir dystirnir verða vístir í Kringvarpinum.