Fótbóltsviðmerkjari: Landsliðsvenjarin eigur at verða uppsagdur

Hóast Føroyar megnaðu at fáa javnleik móti Lettlandi í Nations League-kappingini á Tórsvøll í gjárkvøldið, so var stór ónøgd um, at manslandsliðið í fótbólti ikki megnaði at vinna dystin. 

Oddbjørn Joensen, fótbóltsviðmerkjari, legði ikki fingarnar ímillum, men helt, at tíðin var búgvin til at senda Håkan Ericson, landsliðsvenjara, og hansara fólk til hús. 

"Landsliðsvenjarin stendur her eftir dystin og snakkar um, at vit hava bóltin, men vit skapa einki. Tí spyrji eg: Hvør hevur tað, ið hevur ábyrgdina av tingunum, sum ikki verða skapt á fótbóltsvøllinum? Er tað ikki akkurát Håkan Ericson, venjarin, sum við sínum venjingum og uppleggi skal geva spælarunum møguleikan at skapa (málmøguleikar) á vøllinum?" spurdi Oddbjørn Joensen eftir dystin. 

Svarið gav Oddbjørn Joensen sjálvur:

"Tað er hansara uppgáva! Og bara at siga, at vit skapa einki, er ikki gott nokk? Eg haldi ikki, at tað er gott nokk. Eg haldi næstan, at Fótbóltssambandið skal gera sum Armenia (ið júst hevur sent venjaran til hús, blaðm) og gera skjótt av og finna ein nýggjan venjara."

Landsliðið er uppsteðgað

Oddbjørn Joensen, fótbóltsviðmerkjari, helt, at føroyska manslandsliðið var uppsteðgað, og at tað gekk skeiva vegin.  

"Eingin skal misskilja meg her. Eg hevði ynskt, at vit høvdu eitt landsliðsvenjaratoymi, ið førdi okkum framá, og at teir máttu frá fyri elli um nøkur ár. Tað hevði verið tað mest fantastiska. Men tað er bara ikki soleiðis. Vit mugu siga tingini sum tey eru. Tað gongur afturá við føroyska landsliðnum. "

Oddbjørn Joensen endurtók orðini í sendingini "Fótbóltsprát" seinnapartin, tá hann útgreinaði sína støðu.