Nýggjur listi kunngjørdur í Havn

Ein nýggjur listi er gjørdur til kommunuvalið í Tórshavnar kommunu. Hann eitur Kommunulistin. 

17 fólk eru á nýggja listanum.

Millum tey 17 valevnini, eru tey fýra, sum sita í býráðnum í Havn í dag fyri Javnaðarflokkin: Tróndur Sigurðsson, Kári Johansen, Súna Mørk og Bjørg Dam. 

Men eisini onnur fólk, sum áður hava stillað upp fyri Javnarðarflokkin, eru á listanum. Millum annað eykafólkið hjá Javnaðarflokkinum í Tórshavnar kommunu, Birita Baldvinsdóttir Iversen og Malan á Dunga, ið stillaði upp fyri flokkin til seinasta løgtingsval.

Nýggi listin sigur seg vera politiskt óheftan. 

Her er onki vinstra, høgra, loysing ella samband. Vit hugsa bara um teg og tíni og vilja saman við tær skapa eina fjálga, fevnandi og rúmliga kommunu fyri okkum øll við skilagóðari fíggjarstýring, sigur Kommunulistin í tíðindaskrivi.

Kommunulistin hevur sjey høvuðspunkt í sínari valskrá. Tey eru bústaðir og viðlíkahald, trivnaður, umhvørvið, mentan og ítriv, integratión, vinnan og rúsevni og harðskapur.