Hanni Bjartalíð fær Mentanarvirðisløn landsins 2024

Hanni Bjartalíð fær Mentanarvirðisløn landsins 2024
Listin hjá Hanna Bjartalíð hevur brotið upp úr nýggjum í føroyskum høpi, verður sagt í grundgevingini fyri at lata listamanninum Mentanarvirðisløn landsins 2024
Hanni Bjartalíð, myndlistamaður
Mynd: Bjarni Árting Rubeksen  
 
23.10.2024 - 19:53

Sirið Stenberg, landsstýriskvinna í mentamálum, hevur júst handað myndlistamanninum Hanna Bjartalíð Mentanarvirðisløn landsins fyri 2024 á hátíðarhaldinum í Varpinum í Klaksvík. 

Mentanarvirðisløn Landsins er 150.000 kr.

Hanni Bjartalíð (f. 1968) er myndlistamaður úr Klaksvík, ið hevur nomið sær útbúgving í Kokkola í Finlandi, har hann enn er búsitandi. 


Mynd: Bárður Thomsen

 

Altíð brotið upp úr nýggjum

Í grundgevingini fyri at lata Hanna Bjartalíð Menatanarvirðisløn landsins stendur, at listin hjá Hanna hevur altíð verið serstøk og brotið upp úr nýggjum í føroyskum høpi.

Bæði í sínum málariska og skulpturella úttrykki er Hanni Bjartalíð sín egin. Frá serstøkum illustrativum málningum á ungum árum, til djúpar materiellar flatur seinni á listaleiðini.

Hansara skulpturellu verk og relieffir eru framleidd úr funnum og endurnýttum træi, nágreiniliga koloristiskt málað og telgd.

 

Verk hansara lýsa eina naivistiskt heimliga og humoristiska nostalgi og melankoli. List hansara er skemtingarsom, eyðkennilig fyri okkum øll og setur spurningar um lív og deyða á breddan.

Stóra træklótan, sum listprýðir atrium á Glasi, telist millum høvuðsverk hansara.

 

Egið og sterkt íkast

List hansara kann stundum síggjast sum ein nýtulking av gamlari altjóða myndlistaligari siðvenju, men Hanni Bjartalíð hevur givið sítt heilt egna og sterka íkast til føroyska myndlist.

Hanni Bjartalíð hevur luttikið í eini ørgrynnu av solo- og bólkaframsýningum í Føroyum, Danmark, Finlandi og Týsklandi og luttók á kendu Liverpool Biennaluni í 2012.

Fyri listaligu avrik síni fær Hanni Bjartalíð Mentanarvirðisløn landsins 2024

Er kopiera
Nýggjastu sendingar í ÚV
Fríggjadag 4. apríl
Vikuskiftið 4 apríl 2025
190276
Fríggjadag 4. apríl
Breddin: Suðuroyartunnilin
190254
Fríggjadag 4. apríl
Morgunlestur fríggjadagur 4.apríl 2025
189979
Hósdag 3. apríl
RagnarRokk 3.apríl 2025
189927
Nýggjastu sendingar í SV
Fríggjadag 4. apríl
Veðrið
190275
Fríggjadag 4. apríl
KAKUMiKS (2:7)
190170
Fríggjadag 4. apríl
Dagur og vika - teknmálstulkað
190243
Hósdag 3. apríl
Dagur og vika - teknmálstulkað
190208
Hósdag 3. apríl
Dagur og vika - teknmálstulkað
190180