Ási og Poul: Landsliðsúttøka eftir gullveitslur

Tað kundi ikki gerast nógv betri hjá teimum báðum.

Ási Dam hevði ikki fingið armarnar niður aftur eftir HB-steypagullið leygarkvøldið, meðan Poul Kallsberg framvegis kann smílast um sítt fyrsta FM-heitið við Víkingi.

Og so gjørdist tað kortini upp aftur betri. Um vikuskiftið fingu báðir tveir landsliðsboð fyri fyrstu ferð.

 - Tað er lekkurt. Nakrir góðir dagar nú í seinastuni, og hetta ger tað bara enn betri, segði Ási Dam. 

 - At spæla fyri føroyska landsliðið hevur verið ein dreymur, síðan eg var lítil, segði Poul Kallsberg.

Ætla at gera mun

Føroyar skulu spæla ímóti Armenia og Norðurmakedónia í tveimum teimum síðstu Nations League-dystunum í hesi kappingini, og skal tað eydnast at sleppa av aftasta plássinum, er neyðugt at fáa stig.

Teir báðir hava góðar vónir, og vilja helst sleppa á vøllin eisini.

 - Eg hopi sjálvandi, at vit fáa nøkur stig, og sjálvandi hopi eg, at eg fái nakrar minuttir. Tað er tí, mann er við. Mann vil spæla, segði Poul Kallsberg, sum hevur havt eitt frálíkt kappingarár fyri Víking.

 - Tú veitst aldrinn. Eg fokuseri bara upp á at vera klárur, um eg fái kjansin, segði Ási Dam.

Hevur álit á ungu spælarunum

Eyðun Klakstein og Atli Gregersen, sum hava staðið á odda fyri U21-landsliðnum síðstu árini, hava umframt teir báðar debutantarnar tikið Noah Mneney út til dystirnar, tí teir meta, at hesir eru til reiðar til A-landsliðsfótbólt. 

 - Tað er kortini ikki soleiðis, at nú skulu nakrir U21-landsliðsspælarar inn á manslandsliðið at stýra hesum her, segði Eyðun Klakstein.

 - Vit skulu ikki gloyma, allar teir góðu spælararnar, sum eisini eru í góðum aldri, og sum eru við á landsliðnum. Tað eru teir, sum skulu bera hetta, segði landsliðsvenjarin.