Páll byrjar inni

Eyðun Klakstein sum, saman við Atla Gregersen, stendur á odda fyri føroyska liðnum tveir teir næstu dystirnar hevur valt sínar fyrstu ellivu í útidystinum móti Armenia.

Liðið móti Armenia í dag sær soleiðis út (5-4-1): Teitur Gestsson – Jóannes Kalsø Danielsen, Andrias Edmundsson, Gunnar Vatnhamar, Odmar Færø og Viljormur Davidsen, ið er liðskipari – Jóannes Bjartalíð, Brandur Olsen, René Shaki Joensen og Adrian Justinussen – Páll Klettskarð.

Á bonkinum sita Bárður á Reynatrøð, Mattias Lamhauge, Arnbjørn Svensson, Jann Benjaminsen, Ási Dam, Noah Mneney, Hanus Sørensen, Hallur Hansson, Sølvi Vatnhamar, Poul Kallsberg, Meinhard Egilsson Olsen og Petur Knudsen.

Undan dystinum í dag er Norðurmakedónia fremst í bólkinum við tíggju stigum, nummar tvey og trý eru Armenia og Lettland, sum hava fýra stig í part, meðan Føroyar eru á fjórða plássi í bólki C4 í UEFA Nations League við trimum stigum.

Tá Føroyar og Armenia møttust á Tórsvølli fyri einum mánað síðan, gjørdist úrslitið ein javnleikur 2-2, eftir at Armenia fekk útjavnandi málið í tíðini, sum dómarin hevði lagt afturat.

Málskjúttarnir hjá Føroyum vóru tá Jann Benjaminsen og Jóannes Bjartalíð.

Sjónvarpið vísir dystin, og vit byrja at senda klokkan 16.30.

pall_klettskard_-_hans_erik_danielsen_fsf.fo_2.jpg