Liðskiparin: Tað var primitivt men riggaði til UG

 - Ein fantastisk kensla. Hetta er ein ordilgur arbeiðssigur. Vit spældu ótrúliga primitivt, men vardu ótrúliga væl. Tað var gameplanin, og tað riggaði til UG.

Tað segði føroyski liðskiparin, Viljormur Davidsen, sum sjálvur avgjørdi Nations League-dystin ímóti Armenia við brotssparki fyri steðgin.

Í seinna hálvleiki leikaði hart á frammanfyri føroyska málinum, men tað, sum verjan ikki stóð fyri, tók Teitur Matras Gestsson í føroyska málinum.

Viljormur Davidsen gleddist um endiliga at fáa trý stig í einum kappingardysti aftur eftir laku úrslitini seinastu tvey árini.

 - Sigurin hevur ótrúliga stóran týdning. Eg var sjálvur við fyri 10 árum síðani, tá vit vunnu á Grikkalandi, og at vinna her í dag er fantastiskt. Nú haldi eg, at vit liggja nummar tvey í bólkinum, segði hann.