Sama skil í Vági: Møta ikki á býráðsfundi

"Vit hava ikki so nógv onnur amboð enn at blíva við at kalla inn til fundar og vóna, at støðan broytist, og at fólk taka tað í álvara og møta, sum tey hava skyldu til. Tað er ein skylda at møta upp til fundin."

Tað sigur Arni D. Brattaberg, nú tað heldur ikki í kvøld eydnaðist at savna nývalda býráðið í Vágs kommunu á fund.

Á fundinum í kvøld møttu sjey av níggju býráðslimum, og tað var frægari enn til fyrsta fundin mánadagin, tá bert fimm av níggju møttu. Hesaferð vóru tvey umboð fyri Sambandsflokkin eisini við, men Levi Mørk og Rakul Nolsøe í Lágabø, sum saman við Bjarna Johansen eru innvald á Javnaðarlistanum, møttu heldur ikki á fundinum í kvøld.

"Man má eisini koma víðari og skilja, at nú er støðan annaðleiðis. Hetta málið er nú blivið eitt stríðsmál í staðin fyri at taka tað í álvara, sum man er valdur inn til," sigur Arni D. Brattaberg.

Tey bæði javnaðarumboðini sýta fyri at møta upp, tí Bjarni Johansen sum triðja umboð hjá Javnaðarlistanum valdi at fara í part við Tjóðveldi og tryggja teimum meirilutan.

Hoyrið samrøðu við Arna D. Brattaberg her: