Noomi uttan ávirkan

Toppskorarin á Kvinnulistanum í Sjóvar Kommunu er hildin uttan fyri alla ávirkan, nú bygdaráðið hevur skipað seg. Tað boðar Noomi Káradóttir Rasmussen sjálv frá í tíðindaskrivi í gjárkvøldið, beint eftir at bygdaráðið hevði skipað seg.

Hans Anders Jacobsen verður borgarstjóri í Sjóvar kommunu næstu fýra árini, og sitandi borgarstjóri, Arthur Johansen, verður varaborgarstjóri.

Hans Anders Jacobsen var fyrstvaldur á lista B, sum fekk fýra fólk vald í bygdaráðið. Listi A, kvinnulistin, fekk trý umboð vald.

FAKTA: Valúrslitið í Sjóvar Kommunu

Í fráboðan frá Sjóvar kommunu sæst, at Noomi Káradóttir Rasmussen hevur ongan nevndarsess í kommunustýrinum, meðan hinar báðar á kvinnulistanum - Sandra Ljósá Østerø og Drós Ellingsgaard - hava fingið nevndarsessir.

Sambært tíðindaskrivi frá Noomi Káradóttir Rasmussen var semja um, at øll sjey í nývalda bygdaráðnum skuldu skipa seg í ein breiðan meiriluta, og sjálv skuldu hon sum fyrstvald á kvinnulistanum fáa tríggjar nevndarsessir.

Men Noomi Káradóttir Rasmussen kundi ikki góðtaka, at bygdaráðsfundurin í gjár, har nývalda bygdaráðið skuldi skipa seg, varð hildin fyri afturlatnum hurðum. Hon mótmælti, og hini seks í kommunustýrinum valdu so at skipa seg uttan hana.