At byggja bústaðir er ikki ein kommunal kjarnuuppgáva

Tað er í útgangsstøðinum ikki ein kommunal kjarnuuppgáva at byggja bústaðir, millum annað tí privatur marknaður er fyri hesum, og tí tað vanliga áliggur borgaranum at útvega sær hóskandi bústað.

Kommunufelagið fekk ein fyrispurning frá umsitingini í einum politiskum flokki. Spurt varð um í hvørjum lógum, tað er ásett, at kommunur ikki kunnu byggja bústaðir til onnur enn lesandi og eldri yvir 60 ár.

Skrivstovan hjá Kommunufelagnum vísti á, at hetta løgfrøðiliga vendi eitt sindur øðrvísi, enn spurningurin legði upp til.

Kommunufelagið sigur, at økonomisk tiltøk hjá kommunum skulu hava heimild. Hendan heimild er oftast at finna í lóg ella í sonevndu kommunalfulltrúini.                

Um kommunan skal skipa fyri ella taka lut í hesum virksemi, krevur tað tí serstaka lógarheimild. Slík heimild er fingin til vega í lóg um Húsalánsgrunnin (“Bústaðir”) og í lóg um heimatænastu, eldrarøkt v.m. 

Hesar lógir geva kommununum heimild til ávíst virksemi innan bústaðarbygging - millum annað av tí slagi, sum spyrjarin vísti á.