Yvirfriðingarnevndin ástaðarfund um Varðan Pelagic

Yvirfriðingarnevndin skipar fríggjadagin klokkan 14 fyri ástaðarfundi á havnarlagnum á Tvøroyri í samband við ætlaða byggingina av verksmiðju hjá Varðanum Pelagic. 

- Endamálið við fundinum er, at øll viðkomandi sjónarmið verða hoyrd, soleiðis at avgerðin hjá Yvirfriðingarnevndini verður tikin á mest møguliga upplýstum grundarlagi, skrivar Tvøroyrar kommuna í dag. 

Yvirfriðingarnevndin kom upp í málið, tá felagsskapurin "Livilig kor" 25. desember kærdi niðurstøðuna hjá lokalu friðingarnevndini.

Hetta er onnur kæran í málinum, tí tveir dagar frammanundan kærdi felagsskapurin eisini avgerðina hjá Umvhørvisstovuni at geva umhvørvisgóðkenning til verkætlanina.

Báðar kærur hava steðgandi virknað, men tað forðaði ikki Tvøroyrar kommunu at geva Varðanum Pelagic byggiloyvi 28. desember við tí treyt, at øll neyðug loyvi vóru fingin. 

Tað eru tvey ár síðani, at Varðin Pelagic søkti um byggiloyvi at byggja út á havnarlagnum eystan fyri verandi virkisbygning.