Danir vilja ikki rinda fyri føroyingar í DIS

Landsstýrið hevur til fánýtis gjørt fleiri royndir at fáa pengar frá Danmark fyri føroyingarnar, sum sigla við skipum í DIS, donsku altjóða skipaskránni. Sum er fáa hvørki landskassin ella kommunurnar eina krónu av hýruni hjá føroyingum, sum eru við DIS-skipum.

Í fjør vóru stívliga hálvt fjórða hundrað føroyingar við DIS-skipum. Teir fingu 148 mió. kr. í hýrum. Samhaldsfasti fekk tvær milliónir krónur frá teimum. Men skattur var eingin í Føroyum. Áðrenn DIS kom, fingu Føroyar pengar frá Danmark fyri føroyingar, sum vóru í danska handilsflotanum. Í 1986 til dømis flutti danski staturin Føroyum 11,6 mió. kr., sum var skatturin hjá føroyingunum.

Royndu at fáa endurgjald

Tá DIS so kom, royndu føroyskir myndugleikar at fáa endurgjald fyri mista skattin við tí grundgeving, at DIS var ein stuðul til danska handilsflotan, sigur Jørgen Niclasen, landsstýrismaður, í svari til Reimund Langgaard, løgtingsmann.

Hesin stuðul kom í seinasta enda danska statinum til góðar. Føroyar fingu endurgjald fyrsta árið, men hava síðan einki fingið, hóast spurningurin fleiri ferðir er reistur, seinast á fundi í september í fjør millum Jørgen Niclasen, fíggjarmálaráðharra, og táverandi danska skattamálaráðharran, Thor Møger Petersen.