Tveir minuttir í dreymalandi

Tveir minuttir í dreymalandi.

Tað fingu føroyingarnir í fyrsta HM-undankappingardystinum ímóti Kekkia leygarkvøldið.

Sjey minuttir vóru eftir, tá innskifti Adrian Justinussen skeyt horna úr høgru. Inni í málteiginum leyp Gunnar Vatnhamar hægri enn kekkiski liðskiparin Tomáš Souček og skallaði bóltin í netið til 1-1.

 - Hann bombar hann inn fyri, og eg skal bara seta pannuna á. Kenslan var sjálvandi fantastisk í løtuni, men tað er bara ræðuliga keðiligt beint nú, segði málskjúttin.

Frøin var sjálvsagt stór, tí nú hómaðist javnleikurin ímóti kekkum, sum í níggju dystum høvdu vunnið samanlagt 23-0 ímóti Føroyum. So skuldi kortini ikki vera.

Bert tveir minuttir seinni spældu kekkar seg fram í vinstru síðu, og tá bólturin kom hart innfyri, var Patrik Schick eins klárur og hann var fyri steðgin, tá hann legði Kekkia framum fyrru ferð.

Gott liðavrik

Føroyingarnir máttu tískil taka til takkar við teprum tapi, men avrikið var gott, hóast eydnan eisini var við viðhvørt.

 - Sjálvandi kann mann brúka tað til okkurt, segði Eyðun Klakstein beint eftir dystin. 

 - Vit spæla ein fínan dyst ímóti Kekkia. Vit koma afturíaftur, skora mál og eru líka við. Eg hevði sjálvandi heldur vilja fingið javnleikin, men soleiðis endaði tað nú einaferð, og í minsta lagi kunnu vit siga, at vit fingu tað fyrsta málið ímóti Kekkia.

Føroyar hava nú spælt tríggjar ferðir við Eyðuni Klakstein og Atla Gregersen á odda. Fyrsti dysturin endaði við sigri á Albania, og hinir báðir við eittmáls-tapum ímóti Norðurmakedónia og Kekkia.

Týskvøldið tekur Montenegro ímóti, og við farnu avrikunum í huga, kunnu føroysk fótbóltsviðhaldsfólk loyva sær at vóna og trúgva upp á stig.

Malsovicka Arena, Hradec Kralove (HM-undankapping, 1. umfar)

Kekkia - Føroyar, 2-1 (1-0)

1-0 Patrik Schick, 25 min.
1-1 Gunnar Vatnhamar, 83. min.
2-1 Patrik Schick, 85 min.