Málverjin: Risavónbrot

Null stig á kontuni. Tað er nakni veruleikin eftir tveir teir fystu dystirnar í hesi HM-undankappingini. 

Í Kekkia javnaði Gunnar Vatnhamar, tá sjey minuttir vóru eftir at spæla, men Kekkia avgjørdi bert tveir minuttir seinni, og í Montenegro var tíðin í roynd og veru farin, tá Edvin Kuc skoraði til 1-0 við seinasta sparkinum í dystinum.

 - Tað verður ikki nógv verri enn hetta. Vit kundu faktiskt komið heim við tveimum javnleikum ímóti tveimum sera sterkum liðum, men veruleikin er, at vit koma heim við null stigum, segði málverjin Mattias Lamhauge, sum spældi sín fyrsta landsdyst undir nýggja venjaratoyminum.

Hann var væl nøgdur við verjuspælið ígjøgnum dystin, men helt ikki, at spælið í seinna hálvleiki var nóg gott.