Toppfundurin var at vísa samanhald

Trygdartoppfundurin í Tinganesi í gjár kom brádliga í lag, og hann gekk skjótt fyri seg. Men hann var neyðugur. Serliga fyri at vísa umheiminum, at vit standa saman um Norðuratlantshav , og at vit eru før fyri at hittast við stuttum skotbrá um trygdina í økinum.

Tað heldur Kjell Inge Bjerga, sum er stjóri fyri verjuinstituttið á  lærda háskúlanum hjá norsku verjuni. Og sum professari í verju og trygd.

Tað er ikki av tilvild, at fundurin varð millum júst hesi londini, og at hann varð hildin nú.

Noreg hevur serlig flogfør til at hava eftirlit við havøkjum, og tað kann koma upp á tal, at Noreg skal hjálpa Danmark at hava eftirlit í økinum hjá okkum. Tað er nakað, sum danir hava umrøtt. Tí eftirlit er alneyðugt.