Málið um Íleggingargrunnin er farið aftur í nevnd

Uppskotið um at heimila Íleggingargrunninum at veita P.f. Vága floghavn og P.f. Suðuroyartunlinum rentu- og avdráttarfrítt lán í ávíst áramál er beint aftur í fíggjarnevndina.

Tá málið kom til triðju viðgerð á tingfundinum, sum byrjaði klokkan 13, skeyt Annika Olsen í Tjóðveldi upp at beina málið aftur í nevnd, tí tað hongur saman við málinum um Suðuroyartunnilin, segði hon.

Jørgen Niclasen í Fólkaflokkinum undraðist á, at málið skuldi fara aftur í nevnd, tí tað er fult upplýst, og øll fíggjarnevndin tók undir við tí. 

Jørgen Niclasen

Jørgen Niclasen. 

Hann segði, at verður málið ikki avgreitt, fær tað avleiðingar fyri útbyggingina av farstøðini á flogvøllinum, og arbeiðið noyðist helst at steðga. At beina tað aftur í nevnd merkir, at málið dettur burtur, segði Jørgen Niclasen. 

Sambært uppskotinum skuldi Íleggingargrunnurin fáa heimild at læna Vága floghavn 350 milliónir kr. og eisini Suðuroyartunlinum 350 milliónir.

Uppskotið um at beina málið aftur í nevnd var samtykt við 18 atkvøðum fyri og 14 ímóti.