Trump: 50 prosent toll á útlendskt stál

Amerikanski forsetin, Donald Trump, ætlar at tvífalda tollin á útlendskum stáli frá 25 til 50 prosent.

Tað boðaði hann frá í nátt føroyska tíð, tá hann helt veljarafund í stálverkinum Mon Valley Works-Irvin Plant í býnum West Mifflin í statinum Pennslyvania.

- Vit hækka tollin á innfluttum stáli til USA frá 25 prosentum til 50 prosent. Tað fer at tryggja stálídnaðin í USA enn meira. Eingin kann smoyggja sær undan tí, segði Trump millum annað.

Tollhækkanin skal koma í gildi um fýra dagar. 

Sambært amerikanska handilsmálaráðnum innflutti USA í fjør stál og jarn fyri 31,3 milliardir dollarar, sum svarar til 205 milliardir í okkara pengum.

Kanada er størsti veitari við einum útflutningsvirði upp á 7,6 milliardir dollarar.

Sambært AP-tíðindastovuni eru prísirnir á stálvørum hækkaðir við 16 prosentum, síðani Trump tók við sum forseti í januar í ár.