Árni: Tiki-taka eftir útjavnadi málið

Ferð eftir ferð hevði Árni Frederiksberg skotið vandamikil hornaspørk innfyri, men verjuspælararnir og málverjin hjá Gibraltar ruddaðu ein bólt fyri og annan burtur.

Heilt til 20 minuttir vóru eftir av vanligu leiktíðini. Vongurin legði bóltin til rættis, og so eydnaðist. Bólturin fór hart í einum boga upp um málverjan og inn við handaru stong. So var javnleikur 1-1, og Føroyar kundu fara eftir sigursmálinum við øllum.

 - Vit føla, at vit eru betri enn teir. Vit skapa støðurnar, og vit mangla bara tað allarseinasta hepni, og og so blívur tað tungt. So hatta kann forloysa tað, og so síggja vit, at vit byrja at spæla sum einglar ta síðstu løtuna. Tað er tiki-taka uttanfyri brotstegin, cutback til Patrik, sum var eitt fantastiskt mál. So tað var gott, at hatta kundi geva monnum eitt sindur meir yvirskot í teimum avgerandi støðunum, segði Árni Frederiksberg.

Tað var uppiborið, tá Patrik Johannesen avgjørdi til 2-1 undir Skansanum fimm minuttir fyri leiklok.

 - Teir hava nakrar spælarar, sum kunnu nakað "på egen hånd", men sum heild haldi eg, at vit hava eitt væl betri lið, men málið til 1-0 ger kanska, at vit stressa eitt lítið sindur for nógv, og eru eitt lítið sindur for óróligir við bóltinum, segði Árni Frederiksberg.

SÍ EISINI: MÁLINI: Árni og Patrik ornaðu paragraffirnar eftir steðgin