HB sendi NSÍ úr steypakappingini eftir brotssparkskapping

Gunvá Lützen var stóra hetjan hjá HB, sum sendi NSÍ úr steypakappingini eftir longda leiktíð og brotssparkskapping, og tryggjaði sær pláss í hálvfinalunum.

Málverjin bjargaði einum brotssparki miðskeiðis í seinni hálvleiki við Løkin í Runavík, og tá fari varð undir brotssparkskapping tók hon aftur eitt, meðan tvey onnur fóru framvið málinum, skrivar Fótbóltssambandið.

Tapandi finalisturin í fjør, Víkingur, spældi seg í hálvfinaluni við 3-0 sigri á B36, KÍ hølvaði FC Hoyvík 9-0 og Sara Benjaminsen skeyt hattrikk fyri Skála, sum vann 6-2 á 07 Vestur.

Hvussu liðini møtast í hálvfinalunum, verður avgjørt við lutakasti á Tórsvølli í hósdagin. Hálvfinalurnar verða spældar 3. og 14. septembur. Finalan í steypakappingini hjá kvinnum verður á Tórsvølli leygardagin 27. septembur.