Fyrrverandi føroysk skip á svartalista

Fyrrverandi Gadus hjá JFK í Klaksvík og fyrrverandi Vesturleiki úr Sørvági er millum skipini, sum eru komin á svartalista hjá ES og í Noreg

Melkart-7 er fyrrverandi Gadus hjá JFK samtakinum

Mynd: FleetPhoto.ru

Høgni Djurhuus

John Johannessen

10.07.2025 - 13:34

Barentshavstrolarin hjá klaksvíkingum fram til 2023, sum tá hevði navnið Gadus, eitur í dag Melkart-7. Nýggi eigarin er Murman Seafood, sum hevur fingið bann at virka í ES og í Noreg. Melkart-7 liggur í løtuni í Murmansk, men fiskar annars í Barentshavinum.

JFK seldi í 2023 Gadus til Murman Seafood í Russlandi fyri góðar 60 milliónir krónur. JFK keypti Gadus úr Noreg fyri umleið 40 milliónir krónur.

Melkart-6

Hetta er fyrrverandi Vesturleiki. Hann eitur nú Melkart-6. (Mynd: Vitaly Novikov)

Vesturleiki bleiv eisini russiskur
Vesturleiki var sambært Teyggjuni skrásettur fyrstu ferð í Føroyum í 2006. Eisini hann er seldur til Murman Seafood í Russlandi. Skipið eitur í dag Melkart-6. Melkart-6 liggur eisini, sambært heimasíðuni Marinetraffic, í Murmansk.

Av tí, at Murman Seafood eigur hetta skipið, so er eisini tað bannað í ES sjógvi og norskum sjógvi.