Danska verjan fylgir Melkart-2

Melkart-2 heldur framvegis beina kós á Klaksvík. Tað hevur tað loyvi til, tí skipið er vælkomið í føroyskan sjógv og í føroyska havn, hóast skipið, reiðaríið og alt samstarv við tað er á svartalista hjá bæði Noreg og ES.

Uttanríkis- og vinnumálaráðið hevur eisini sagt, at skipið er vælkomið í føroyska havn.

Tó hevur danska verjuskipið, Knud Rasmussen, í kvøld verið ein túr á leiðini hjá Melkart-2. Tað vísa AIS data frá Fishfacts.

Kringvarpið hevur fleiri ferðir í dag roynt at fingið eina viðmerking um støðuna frá Sirið Stenberg, landsstýriskvinnu í uttanríkis- og vinnumálum. Hvørki hon ella embætisverkið svara, men tó hava tey sent eina mynd úr Kyiev og boðað frá, at Sirið Stenberg í dag vegna landsstýrið hevur lagt eitt silkiband í føroysku flagglitunum á Frælsistorgið í Kiyev,

sirid.jpg

Skipið, sum er á veg til Føroya, er bannað í ES og í Noreg, tí tað verður mett at vera ein partur í stríðnum. Tí hava vit í dag sent fleiri fyrispurningar til Uttanríkis- og vinnumálaráðið og beinleiðis til Sirið Stenberg, um samanhangin millum vitjanina í Kiyev og at Melkart-2 er á veg inn á Klaksvík og seinni til fiskiskap í føroyskum øki. Tað hevur higartil ikki eydnast at fáa annað svar enn myndina og stutta tíðindaskrivið.