Framvegis avlop á gjaldsjavnanum

Framvegis er avlop á gjaldsjavnanum.

Tað var 1,3 milliardir krónur í 2023. 

Avlopið kemst av, at Føroyar útfluttu fyri fleri krónur enn innflutt var fyri.

Harafturat hava inntøkuflytingar netto verið positivar, tí nógvir føroyingar arbeiða uttanlands. Og ríkisstuðulin úr Danmark gevur eisini sitt íkast til avlopið.

Nettoognin hjá Føroyum var 5,1 milliard krónur í 2023. Tað eru 19 prosent av bruttotjóðarúrtøkuni.

Nettoognin í 2023 stavar fyrst og fremst frá fíggjarligu feløgunum, skrivar Landsbankin.

Tað er pensjónsuppsparingin hjá fólki, sum føroysku pensjónsfeløgini og peningastovnarnir umsita og hava sett í puljur við útlendskum virðisbrøvum, sum standa sum ogn hjá fíggjarfeløgunum.

Positiv nettoogn í 20 ár

Føroyar hava tey seinastu 20 árini havt positiva nettoogn mótvegis útlondum.

Men í 2022 var skuldin størri enn ognin.

Orsøkin var, at skuldin hjá vinnuni vaks nógv hetta árið. Men hon minkaði aftur í 2023.

Og harafturat minkaðu virðini á partabrøvum, sum útlendingar eiga í føroyskum fyritøkum, í 2023, skrivar Landsbankin.