Gongst striltið at selja almennar bygningar

Aftur í fjør var roknað við fleiri inntøkum á fíggjarlógini av at selja almennar bygningar, enn tað veruliga eydnaðist at fáa burturúr.

Metta inntøkan var níggju milliónir. Hon bleiv bara 1,8 milliónir.

Tað var ognin hjá Heilsumálaráðnum og Klaksvíkar sjúkrahúsi, Oman Reyðhús 4 og 6 í Klaksvík, sum varð seld fyri 1,8 milliónir krónur.

Landsverk kann bara selja almennar bygningar, um avvarðandi aðalráð gevur loyvi til tess.

Loyvi fæst sjáldan

Og sum skilst, fæst slíkt loyvi sjáldan. Tí vera so fáir almennir bygningar seldir.

Landið ætlaði sær 37 mió.kr., tí studentaskúlin í Hoydølum skuldi seljast Tórshavnar kommunu. 

Men tann sølan verður av ongum.

Ognin á Sanatoriivegi 11 til 15 verður tí framvegis landsins ogn, sum Almanna- og Mentamálaráðið nú hevur ræði á.