Gleðir seg til fullsettan Tórsvøll

Tað verður fullsett á Tórsvølli í annaðkvøld, tá Føroyar tekur ímóti Kroatia í HM-undankappingardysti.

Roknað verður við eini 500 kroatiskum viðhaldsfólkum og fleiri túsund føroyingum á áskoðararplássunum, og tað gleðir Hanus Sørensen.

 - Tað er heilt fantastiskt. Eg var og hugsi inni á FSF-heimasíðuni í dag, og tað stóð, at tað er útselt. So eg gleði meg ekstremt nógv, og tað ger alt toymið eisini, sigur Hanus Sørensen, sum sjálvsagt vónar at byrja inni ímóti Luka Modrić og hinum kroatunum.

LES EISINI: Vit gita: Hetta verður liðið ímóti Kroatia

Miðvallarkabalin skal leggjast av nýggjum, tí Hallur Hansson og René Shaki Joensen ikki eru við, meðan millum annað Gezá Dávid Turi og Jóannes Bjartalíð eru aftur í hvítum, reyðum og bláum. 

 - Tað er líka mikið, hvørjum tú spælir ímóti. Tó vónar altíð at byrja inni á landsliðnum. Tað er ein æra at ganga inn á Tórsvøll sum ein av teimum fyrstu 11, óansæð um tað er ímóti Modrić ella Ronaldo, sigur Hanus Sørensen.