Jóannes Bjartalíð ætlar sær ikki heim enn

Jóannes Bjartalíð spældi frá byrjan, tá Føroyar vunnu 1-0 á Gibraltar í Gibraltar. Hann hevur sitið uttanfyri ein stóran part av 2025 við afturvendandi skaða. 29 ára gamli klaksvíkingurin skal í næstum til at hugsa um framtíðina.

- Eg havi einki at avdúka. Eg havi, sum tey flestu nokk vita, sáttmála fyri restina av hesum árinum. Eg veit ikki hvat framtíðini hevur at bjóða. Eg vil gjarna halda fram uttanlands, men hvar tað verður veit eg ikki. Eg taki tað róligt og hugsi bara um at sleppa undan skaðum, og at spæla so nógv, sum eg kann, segði Jóannes Bjartalíð eftir sigurin á Gibraltar.

Hann var ónøgdur við sítt egna avrik, men var fegin um sigurin. Undan landsliðsumfarinum spældi Ferdrikstad móti Premier League felagnum Crystal Palace í UEFA Conference League.

- Tað var ein stór uppliving. Tað eru spælarar, sum hava vunnið FA Cup og Stórsteypadystin. Eg merkti beinanvegin, at tað eru spælarar á høgum stigi. Teir eru væl bygdir og tað er sum at renna inn í ein betongmúr, sigur Jóannes Bjartalíð, sum heldur at tað var eitt sindur øðrvísi enn at spæla landsdyst.

- Ja, eg haldi tað. Tær spæla á høgum stigi og allir eru øgiliga góðir. Vit spældu tveir góðar dystir móti teimum og taptu 1-0 samanlagt. Nú veit eg ikki, um teir spældi við fullari ferð, men tú følir væl, at tað er langur vegur at koma til Premier League, sigur Jóannes Bjartalíð brosandi.

Leysasøgur hava sent Jóannes Bjartalíð heim til KÍ, men tað er sær út til, at norðoyingar mugu brynja seg við toli. Komandi dystur hjá Fredrikstad FK verður leygardagin móti Molde. Hesi bæði liðini kappast um 9. plássið í Elituseriuni, sum er besta deildin í Noreg.