Bakkafrost í Skotlandi stevnt atgerðarmanni

Bakkafrost í Skotlandi hevur stevnt atgerðarmanninum, Don Staniford.

Málið verður viðgjørt í Dunoon Sheriff Court í apríl næsta ár, skrivar Kyst.no.

Tríggir dagar eru settir av til málið.

Bakkafrost hevur stevnt, tí Don Staniford hevur verið á ognunum ella við tær hjá Bakkafrosti í Skotlandi, bæði á landi og á sjógvi.

Bakkafrost vil hava rættin at banna honum tað.

Forboðið skal eisini galda fyri fólk, sum virka hansara vegna, sigur Bakkafrost. Staniford skal ikki koma nærri ognum hjá Bakkafrosti enn 15 metrar er kravið.

Atgerðarmaður í 20 ár

Aðrar alifyritøkur, so sum Mowi Scotland og Scottish Sea Farms, hava longu fingið forboð móti Don Staniford.

Hann er atgerðarmaður, aktivistur, móti laksaaling. Hann hevur verið tað í yvir 20 ár.

Staniford skyldar Mowi Scotland 123.000 pund, góða millión, í sakarkostnaði.

Hann sigur seg hvørki vera føran fyri ella vilja gjalda.