Formansskapurin á vitjan í Kanada

Formansskapurin hjá løgtinginum var í Ottawa í Kanada í síðstu viku.

Formansskapurin var í kanadisku tingunum, bæði í House of Commons og í senatinum.

Hann var eisini í Hægstarætti, har greitt var frá millum annað støðuni hjá Quebec eftir fólkaatkvøðuna í 1995. 

Og tey vóru í stjórnarskrivstovuni hjá Quebec, har greitt var frá politisku søguni hjá Quebec.

Formansskapurin vitjaði haraftrat Elections Canada.Tað er myndugleikin, sum skipar fyri valunum til tjóðar- og landspartatingini.

Trygdar- og verjupolitikkur

Formansskapurin hevði fund við David Perry, ein av fremstu serfrøðingunum í kanadiskum trygdar- og verjupolitikki.

Tey hittu Kasper Ladegaard, trygdarattaché hjá Danmark í Kanada, sum greiddi frá trygdar- og verjupolitikki í norðurhøvum.

Og formansskapurin hitti umboð fyri kanadisku skattamyndugleikarnar, fiskivinnumyndugleikarnar og Conference Board of Canada, sum er millum fremstu tankasmiðjunum við serkunnleika í kanadiskum búskapi og heilsupolitikki. 

Tey hittu eisini danska sendiharran í Kanada, Nikolaj Harris.