Vónbjørt Vang: "Svørt orkidé spratt burtur úr einari skrivikreppu"

Tá Dagur og vika eitt sindur í 11 í dag var á gátt hjá Vónbjørt Vang, rithøvunda, í Syðrugøtu, minuttir áðrenn tað bleiv avdúkað, at hon hevði vunnið bókmentavirðisløn Norðurlandaráðsins, var hon takksom. 

"Hetta er ein risaheiður, ið eg ongantíð hevði droymt um at fingið," ásannaði Vónbjørt Vang. 

"Eg havi grátið nógv, tí eg eri so takksom fyri, at dómsnevndin veruliga hevur nærlisið og skilt verkið."

"Svørt orkidé" var á ongan hátt eitt yrkingasavn, ið kom lættliga til Vónbjørt Vang. Í roynd og veru, so var í mitt í einari skrivikreppu, tá bókaverkið byrjaði at spretta úr henni. 

"Av tí, at eg ikki ordiliga fekk skrivað nakað, so byrjaði eg bara at gera nakrar myndakolasjur, ið skuldu lýsa tað, sum eg føldi, hóast eg á ongan hátt eru myndlistakvinna. Tað hevði við sær, at orðini byrjaðu at fylgja aftaná."

Sí innslagið úr Degi og viku við Vónbjørt Vang.