Inntøkur frá veiðigjaldi og avreiðingargjaldi

Tveir triðingar av tilfeingisgjaldinum, sum landskassin hevur fingið í ár av uppsjóvarfiski, er fyri makrel.

Landskassin hevur fingið knappliga 140 mió. í veiðigjaldi og avreiðingargjaldi fyri sild og makrel í ár. 100 milliónir eru fyri makrel og 40 milliónir fyri sild.

30. november vóru komnar 138,8 milliónir kr. í tilfeingisgjøldum frá uppsjóvarvinnuni. Tað er nakað væl meira enn landsstýrið væntaði at fáa.

Fingu meira enn væntað

Landsstýrið væntaði, tá lógin kom í tingið í vár, at fáa 107 mió. kr. Tá varð samanborið vil fiskiskapin í fjør, sum tó ikki var so góður sum í ár.

Veiðigjaldið fyri makrel er 75 oyru fyri kilo og 35 oyru fyri kilo av norðhavssild.

Tá landað varð til útlendsk skip, var avreiðingargjaldið tvær krónur fyri kilo, tó bara ein króna hjá heimaflotanum.

Sambært Fiskiveiðieftirlitinum eru báðar kvoturnar at kalla fiskaðar í ár. 1265 tons eru eftir av makreli. Kvotan er 143.795 tons. Og 677 tons av norðhavssild eru eftir. Kvotan er 105.230 tons.