Betri havnaviðurskifti í Svínoy

Í Svínoy hava tey fingið betri havnaviðurskifti, nú ein verjugarður og betri trygdarútbúnaður er gjørdur fyri 1,25 milliónir krónur.

Saman við Klaksvíkar kommunu hevur Landsverk gjørt ymsar ábøtur á havnalagnum við Eiðið, har onnur atløgubryggjan til ferðasambandið í Svínoy liggur, eins og ábøtur eru gjørdar við havnaløgini við bygdina.

Verjugarður gjørdur

Ein seks metur langur verjugarður er gjørdur úti í Glógvansurð, sum hevur til endamáls at verja uttasta partin á bryggjuni, har tað breyt og kundi gera bryggjuna rættiliga hála.

Dekkini á øllum trimum havnaløgunum í Svínoy - í Glógvansurð, í Víkini og við Eiðið - eru øll bøtt og slættaði við einum tunnum betonglagi omaná, har tað hevur verið neyðugt.

Eisini er nýggj girðing gjørd fram við bryggjukantinum við Eiðið, upplýsir Landsverk.