Mentanarvirðislønir landsins handaðar í Kolshøll á Eiði í kvøld

Mentanarhøllin Kolshøll á Eiði verður í kvøld klokkan 20 karmur um handanina av mentanarvirðislønum landsins. 

Tað er Eirikur í Jákupsstovu, landsstýrismaður í almanna- og mentamálum, sum fer at handan virðislønirnar til lista- og mentafólk. 

Tríggjar virðislønir verða handaðar:

Mentanarvirðisløn landsins, sum er 150.000 kr. Hon verður latin fyri at heiðra føroyskt mentafólk sum tøkk fyri útint listarligt avrik.

Heiðursgáva landsins, sum er 75.000 kr. Hon verður latin teimum, ið hava virkað til frama fyri mentanarlig virði, sum hava týdning fyri føroyska mentan, list og mentanararv.

Serstøk virðisløn, sum er 50.000 kr. Hon verður latin listafólki, mentafólki ella felagsskapi eftir landsstýrisfólksins egnu avgerð.

Kringvarp Føroya sendir beinleiðis frá hátíðarhaldinum í Kolshøll í sjónvarpinum í kvøld klokkan 20 og her á heimasíðuni. 

Kolshøll er gamla fimleikarhøllin í Eiðis skúla, sum er umbygd til at kunna hýsa nógvum ymiskum mentanarligum tiltøkum so sum fyrilestrum, tónleikaframførðslum, listaframsýningum og øðrum.

Í framførsluhølinum, har handanin verður, kunnu 105 fólk sita.

MV25

Hvat: Mentanarvirðislønir landsins
Hvar: Í Kolshøll, Eiði, og í sjónvarpinum og á KVF.fo
Nær: Í kvøld, fríggjakvøldið 21. nov., klokkan 20.00