LÍV byggir leiguíbúðir í Runavík

LÍV Fastogn fer at gera 18 nýggjar leiguíbúðir í miðbýarøkinum í Runavík.

Íbúðirnar vera klárar á sumri 2027.

Avtala er gjørd við smápartafelagið Bryggjuna um at keypa byggiverkætlanina til Lon 1 í Runavík, og avtala er gjørd við smápartafelagið Jóan Petur Vang um at byggja leiguíbúðirnar fyri LÍV Fastogn.

Á heysti 2026 verður møguligt hjá fólki at skriva seg á bíðilista, men viðskiftafólk hjá LÍV hava framíhjárætt til íbúðirnar.

LÍV Fastogn er partur av tryggingarfelagnum LÍV og ger íløgur í íbúðir og aðra fastogn í Føroyum.

Tá byggiverkætlanin í Runavík er liðug, verður LÍV Fastogn eigari av 104 leiguíbúðum í Føroyum, skrivar felagið í tíðindaskrivi.