Fíggjarpolitiska regluverkið komið í tingið

Ruth Vang, landsstýriskvinna í fíggjarmálum, er nú komin í løgtingið við einum uppskoti, sum hon hevur tosað nógv og leingi um, nevniliga fíggjarpolitiskt regluverk. 

Endamálið við uppskotinum er at tálma vøkstrinum í rakstrarútreiðslunum, soleiðis at útreiðslurnar vaksa í mesta lagi eitt prosent samanborið við útreiðslurnar undanfarna ár,  framskrivaðar við lønar-og prísvøkstri.

Uppskotið fevnir ikki um útreiðslurnar hjá kommununum, men bara um útreiðslurnar hjá landinum. 

Fíggjarmálaráðið sigur, at í fyrstu atløgu er ætlanin at fáa fyriskipanirnar at virka fyri landið. Arbeitt verður síðani víðari við, hvussu og nær alt tað almenna kann verða fevnt av fyriskipanunum um rakstur, inntøkur og løgur.

Útreiðslur skulu fíggjast

Í uppskotinum stendur, at tað er ikki beinleiðis krav um, at inntøkurnar til landskassan skulu vera so og so stórar. Men verður skatta- og avgjaldsgrundarlagið broytt við lóg, soleiðis at nettoinntøkurnar minka av teirri orsøk, verður munurin drigin frá í hámarkinum fyri, hvussu nógv rakstrarútreiðslurnar kunnu vaksa. 

Uppskot um t.d. skattalættar, hægri barnafrádrátt ella mvg-frítøkur skulu tí verða fíggjað við uppskotum um aðrar inntøkur, t.d. okkurt avgjald, ella við at lækka hámarkið fyri útreiðsluvøkstrinum, stendur í uppskotinum.

Uppskotið um fíggjarpolitiskt regluverk kemur til fyrstu viðgerð hósdagin.

Les uppskotið her.