Næmingar fegnast um at sleppa til orðanna

Miðalaldurin í løgtinginum var lægri í dag, tá næmingarnir í 8. og 9. flokkunum settu dagsskránna í tingsalinum.

Árliga Ungdómstingið, sum Løgtingið skipar fyri, var sett fyrrapartin í dag.

32 næmingar á framhaldsdeildunum úr sjey skúlum eru við í Ungdómstinginum.

Skúlarnir, sum eru við í ár eru Runavíkar kommunuskúli, Sandoyar Meginskúli, Tvøroyrar skúli, Skúlatrøð, Sørvágs skúli, Skúlin á Fløtum og Skúlin við Løgmannabreyt.

Á skránni í dag var fyrsta viðgerð og nevndarviðgerð av teimum níggju uppskotunum hjá næmingunum, sum snúðu seg um alt frá at seta aldursmark á nýtslu av snildtelefonum og sosialum miðlum til bíligari og betri atgongd til menstruatiónsvørur.

Øll uppskotini hjá næmingunum kunnu lesast her.

Endamálið við Ungdómstinginum er m.a., at ung gerast meira virkin í fólkaræðinum og samfelagskjakinum.

Tað er nevniliga gott at sleppa til orðanna, siga næmingarnir.

Vit eru jú partur av fólkinum, so vit eiga eisini at vera við í fólkaræðinum.

 Eva Sofía Rein, sum gongur í 8. flokki á Skúlanum á Fløtum

Í morgin skulu uppskotini hjá næmingunum til aðru viðgerð og til endaliga atkvøðugreiðslu.

Hoyr eisini samrøðu við tveir uppskotsetarar í útvarpstíðindunum á middegi.

Sí eisini myndir frá Ungdómstinginum.