Tekur tríggjar mánaðir at gera kanningar á Skarvanesleiðini

Tað fer at taka umleið tríggjar mánaðir at gera neyðugar kanningar á Skarvanesleiðini, áðrenn svar fæst um faldirnar, sum ætlaði Suðuroyartunnilin skal fara ígjøgnum.

Tað sigur Jarðfeingi.

Fíggjarnevndin hevur sett Jarðfeingi og Eiriki í Jákupsstovu, landsstýrismanni í tilfeingis- og vinnumálum, seks spurningar viðvíkjandi ætlaðu prosjekteringini av Suðuroyartunlinum.

Jarfeingi metir, at Skarvanesleiðin er ikki nógv væl kannað, og mælir tí til, at fýra boringar verða gjørdar fram við landsvegnum heima á Sandi, at mátingar verða gjørdar í holunum, og hugt verður at jarðfrøðini nærhendis.

Tað fer at taka umleið tríggjar mánaðir, áðrenn øll úrslitini eru klár og frágreiðingar skrivaðar, stendur í svarinum til fíggjarnevndina.

Suðuroyartunnil og Sandoy

Múlaleiðin

Fíggjarnevndin hevur eisini spurt um alternativu tunnilsleiðina, Múlaleiðina, tað vil siga um tunnilin fer niður stutt norðan fyri Sands bygd.

Eisini har skulu fleiri kanningar gerast aftrat, sigur Jarðfeingi. Millum annað skal jarðfrøðin kortleggjast, magnetiskar mátingar skulu gerast, kjarnuboring skal gerast norðan fyri Sands bygd, rivur skulu kannast á sjónum, og seismiskar kanningar og dýpdardátur skulu gerast millum Sandoynna og Skúvoynna.

Tað fer at taka góðar tríggjar mánaðir, áðrenn úrslit frá kanningunum og frágreiðingar eru skrivaðar, sigur Jarðfeingi.

Løgmaður í fíggjarnevndini

Aksel V. Johannesen, løgmaður, og nevnd og leiðsla í P/F Suðuroyartunlinum hava í morgun verið innkallað í fíggjarnevndina at svara 59 ymiskum spurningum um Suðuroyartunnilin. Svarini eru ikki almenn enn.

Lógaruppskotið um Suðuroyartunnil skal úr aftur fíggjarnevndini um tvær vikur, 18. februar, og Eyðgunn Samuelsen, forkvinna, hevur sagt við Kringvarpið, at málið er, at freistin heldur.