Liberali flokkurin vann stórsigur á valinum í Japan

Sanae Takaichi vann stórsigur á valinum til japanska undirhúsið í gjár.

Hennara flokkur, Liberal Democratic Party , fekk 316 av 465 sessum - tað besta úrslitið hjá flokkinum higartil - og saman við samgonguflokkinum, Ishin no Kai, hevur hon meira enn tveir triðingar av tinginum aftanfyri seg. 

Tað gevur henni møguleika at trumfa yvirhúsið, og fer at gera politiska arbeiðið lættari, skrivar Reuters.

Fyrsta kvinnan

Sigurin er eisini søguligur, tí hetta er fyrstu ferð, at ein japanskur flokkur við kvinnuligum leiðara vinnur eitt val í Japan. Takaichi, sum hevur fyrrverandi bretska forsætisráðharran, Margaret Thatcher, sum fyrimynd, hevur fingið stóran stuðul, eftir at hon tók við valdinum í LDP-flokkinum í oktober í fjør.

Hon hevur lagt dent á trygd og eina meira tjóðskaparliga kós, serliga í sambandi við Kina og Taivan. Útsagnir um skattalættar og at taka meirvirðisgjaldið á matvørum av, hava tó elvt til órógv á fíggjarmarknaðunum. 

Reuters sigur eisini, at Takaichi stendur sterkt millum ungar veljarar. Hon ætlar at seta ferð á búskapin og at økja um verjuútreiðslurnar.