Hýruvognarnir merkja ikki nógv til valið

Vanligt er,  at politiskir flokkar lýsa við, at fólk kunnu ringja til teirra, um tey vilja verða koyrd á valstaðið. 

Soleiðis er eisini til løgtingsvalið í dag. Flestu politisku flokkar, sum stilla upp til løgtingið, hava boðað frá, at fólk kunnu seta seg í samband við teir, um tey vilja verða koyrd á valstaðið og heimaftur.

Flokkarnir siga við Kringvarpið, at teir koyra kring alt landið. Og, sum vit skilja, so er størsti áhugin fyri at verða koyrdur í høvuðsstaðnum. Koyringin kring landið verður fyriskipað t.d. av økisfeløgum, ella - í onkrum føri - av valevnum, sum búgva ymsastaðni í landinum.

Farin tíð

Og tó. Ein flokkur sigur við Kringvarpið, at tey ikki skipa fyri koyring á valstaðið hesa ferð. Tað hoyrir til eina farna tíð, tá fólk ikki høvdu egnan bil. Og áhugin fyri at verða koyrdur hevur verið øgiliga lítil til undanfarin val.

Og møguliga er okkurt um tað. Tær báðar hýruvognsstøðirnar í Havn, Auto og Bil, siga báðar við Kringvarpið, at tær ikki hava meiri enn vanligt at gera, hóast løgtingsval er í dag. Og tað var heldur ikki nógv koyring fyrradagin, tá fólkatingsval var.