Helgi Abrahamsen verður formaður í fíggjarnevndini

Hóast tingfundurin ikki er tikin uppaftur enn, eru tríggir formanssessir avgreiddir

Tað var longu greitt fyri løtu síðan, at nýggi javnaðartingmaðurin, Ben Arabo, verður formaður í vinnunevndini, og Súsanna Bertholdsen í mentanarnevndini og nú er eisini greitt, hvør verður formaður í fíggjarnevndini.

Tann sessin fær Helgi Abrahamsen og ikki Erhard Joensen, sum vit hava tosað meira um í hesum sambandinum.

Men tað var alla tíðina ivi, tí Sambandsflokkurin hevur bara henda stóra formansessin, og flokkurin hevur alla tíðina sagt, at einki var avgjørt. Men tað er tað so nú.

Sambamdsflokkurin hevur eisini formannin í Landsstýrismálanevndini, men tann nevndin hevur ikki somu tyngd sum til dømis fíggjarnevndin.

Tað var ætlanin, at fundurin skuldi byrja aftur nú klokkan hálvgum fýra, men av tí, at andstøðuflokkarnir ikki eru heilt lidnir, varð fundurin niðurlagdur aftur og verður tikin uppaftur klokkan tíggju minuttir í fýra.