Gildistíðin á veiðiloyvum verður 10 ár

Nú skal løgtingið taka støðu til, um gildistíðin á veiðiloyvunum í fiskivinnuni skal verða  10 ár.

Tað er partur av teimum broytingum í sjófeingislógini, sum eru lagdar fyri løgtingið. 

Uppskotið fær fyrstu viðgerð í dag.

Sjófeingislógin sigur, at landsstýrismaðurin á hvørjum ári leggur uppskot fyri løgtingið, um gildistíðin á rættindum skal leingjast eitt ár.

Tað er ikki gjørt síðstu árini. Og tí hava verandi veiðiloyvi og rættindi gildi til 1.januar 2034. Tað er um gott og væl sjey og eitt hálvt ár.

Í samgonguskjalinum millum Fólkaflokkin, Sambandsflokkin og Javnaðarflokkin stendur, at "vit skulu hava eina loyvisskipan við 10 ára loyvum."

Og tað verður nú framt í verki. 

Í uppskotinum um broyting í sjófeingislógini, sum Bárður Nielsen, landsstýrismaður, hevur lagt fram, at frá 1.januar verður gildistíðin á loyvunum til 1.januar 2037. Tað vil siga 10 ár.

Tað verður tó framvegis soleiðis, at landsstýrisfólkið á hvørjum ári skal leggja uppskot fyri løgtingið um at leingja gildistíðina á loyvunum eitt ár.

Nýggjur politiskur veruleiki

Tað er ein nýggjur politiskur veruleiki, at breið semja er um, at gildistíðin á veiðiloyvunum í fiskivinnuni skal vera 10 ár.

So seint sum í november í fjør varð lógaruppskot um at broyta sjófeingislógina sent til hoyringar. Í tí uppskotinum var einki nevnt um gildistíðina á veiðiloyvinum. Og tí fara verandi loyvi framvegis úr gildi 1.januar 2034.

Føroya Reiðarafelag eftirlýsti í tí sambandi, at landsstýrið kom við uppskoti um at leingja gildistíðina á verandi loyvum. Reiðarafelagið helt tá, at gildistíðin átti at vera 12 ár.

Semja um 10 ár

Tá løgtingsval varð útskrivað segði Fólkaflokkurin í valskránni, at gildistíðin eigur at vera 12 ár. 

Politiska semjan millum ABC-flokkarnar bleiv 10 ár. Og tað skal løgtingið nú taka støðu til.

Lógaruppskotið, sum Bárður Nielsen, landsstýrismaður í fiskivinnumálum eigur,  hevur harumframt fleiri tekniskar broytingar við sær. Flestu teirra eru tær somu, sum undanfarni landsstýrismaður í fiskivinnumálum arbeiddi við og sendi til hoyringar, men ikki kom í tingið við, áðrenn val varð útskrivað.

Hoyringsarsvarini, sum fylgja við uppskotinum, eru skrivað til lógaruppskotið hjá undanfarna landsstýrismanni. 

Les uppskotið her.