Revsitiltøkini halda fram

Nýggja landsstýrið í Føroyum hevur onga ætlan um at broyta revsitiltøkini móti tveimum russiskum reiðaríum, hóast tveir flokkar, sum nú eru í landsstýrinum, vóru í móti teimum, tá tey komu.

Tað skrivar Intrafish, sum spurdi landsstýrið.

Landsstýrið ætlar heldur ikki at strika onnur revsititøk móti Russlandi.

Intrafish spurdi eisini, um fiskiveiðusáttmálin við Russland heldur fram.

Men tí spurninginum svarar landsstýrið ikki.

Uttanríkis- og Fiskimálaráðið, sum hevur svarað Intrafish við telduposti, sigur seg ikki hava fleiri viðmerkingar í løtuni.

Intrafish hevur í nógvar vikur roynt at fingið landsstýrið at svara ymsum spurningum. 

Ein spurningur er um trygdarváðan, ein annar, hvørjar fíggjarligu avleiðingarnar vera fyri Føroyar, um fiskiveiðuavtalan verður søgd upp.