Smyril: Stuttligt tá ein bátur í bygdini vinnur

Kappróðrarlagið í Vági er gott, eftir at tað eydnaðist Smyrli at vinna 6-mannafarsróðurin hjá monnum á norðoyastevnu í harðari kapping við Froðbing úr Froðbiar Sóknar Róðrarfelag.

 - Tað er heilt sikkurt. Tað er stuttligt, tá ein bátur í bygdini vinnur, og vit føla tað væl, tá vit ganga eftir vegnum ella koyra bil, at fólk heilsa ella floyta, segði Janus Augustinussen í "Millum tøkini" týsdagin.

Róðurin í Klaksvík var javnur og spennandi, og Smyril kom á mál smá tvey sekund frammanfyri grannarnar. Í triðja plássi var Sundabáturin smá fimm sekund aftanfyri vágbingarnar, so tað er ikki óhugsandi, at norðingarnir blanda seg upp í toppstríðið eisini.

HOYR EISINI: Millum tøkini #9 Norðoyarstevnuróðurin

Gunnar í Dali av Froðbingi var sum vera man ikki heilt nøgdur við 2. plássi, og ætlar sær eitt pláss longur upp á Eystanstevnu 13. juni.

 - Ja, tað gera vit, segði hann við Ludvík við Stein.

 - Á norðoyastevnu er altíð eitt sindur av spenningi og nervum og eitt sindur av panikki. Nú havi eg roynt tað nakrar ferðir, men kanska restin av manningini ikki hevur roynt tað so ofta, segði Gunnar í Dali, sum rør fyri síðstu ferð í ár.

Hann avdúkaði eisini, at teir funnu útav, at tvær árar vóru sprekkaðar beint áðrenn start, og at menn av tí sama vóru eitt sindur varnir. 

 - Tann panikkurin verður so ikki har næstu ferð. 

SÍ EISINI: Norðoyastevnan 2026