500 skúlanæmingar í Havn í matarskipan

Tórshavnar kommuna søkir nú eftir køksleiðara til nýggju matarskipanina til fólkaskúlarnar í kommununi.

Endamálið við matarskipanini er at tryggja, at næmingar fáa eina góða máltíð mitt á degi.

Í fyrsta umfari vera 500 næmingar í skipanini.

Tað eru næmingar í miðdeildini í skúlanum á Fløtum, grunddeildini í Eysturskúlanum og øllum flokkum í Kollafjarðar skúla.

Maturin verður gjørdur í framleiðslukøkinum í Skúlanum á Fløtum.

Stórur áhugi fyri skipanini

Køksleiðarastarvið er fulltíðarstarv, í fyrsta lagi til 31. desember næsta ár. 

Starvið verður sett 1. september ella eftir nærri avtalu. Umsóknarfreistin er 20. juli.

Kanningar, sum kommunan hevur gjørt, siga, at foreldur og næmingar hava stóran áhugi fyri matarskipan.

Nógv eru eisini sinnað at rinda fyri skipanina. 

Arbeitt verður við eini skipan, sum partvís er fíggjað við brúkaragjaldi.