Eru sum heild væl fyri viðvíkjandi mattrygd

Brúk er ikki fyri vegleiðing um, hvussu føroyingar skulu bera seg at í støðum við avbyrging.

Vísast kann í hesum sambandi á, at tilbúgvingin mælir til, at fólk hava mat og drekka til trý samdøgur.

Tað er svarið frá Jacob Vestergaard, landsstýrismanni, til Sámal Petur í Grund, løgtingsmann.

Hann spurdi, um ætlanin er at geva føroyingum vegleiðing um, hvussu teir kunnu fyrireika seg í støðum við avbyrging, serliga tá hugsað verður um mat.

Eru sum heild væl fyri

Føroyar eru sum heild væl fyri viðvíkjandi matvørutrygd, sigur Jacob Vestergaard.

Men eitt langt tíðarbil uttan innflutning kann gera, at grønmeti og frukt fara at mangla.

Tað hevði eisini ávirkað bøndurnar, sum sannlíkt høvdu verið noyddir at umskipa sín rakstur og slátra djór.

Tað er tó umráðandi at leggja dent á, sigur landsstýrismaðurin, at sjálvt um trot er á ávísum matvørum, so hevði trot ikki verið á mati, tí í eini kreppustøðu er sjógvurin okkara kovi.