Feløgini fjálga um barnaróðurin

Føroysku kappróðrarfeløgini leggja nógv fyri, og týðandi partur av virkseminum er barnaróðurin.

Nógv fólk skal til fyri at manna bátarnar, og barnaróðurin verður mettur at vera týðandi liður í royndini  at útvega sær nýtt fólk.

Tí syrgja feløgini eisini fyri, at børnini hav góðar og hóskandi umstøður.

 - Tey hava sama týdning sum øll onnur fyri at fáa manningar aftur, tá tey fara upp í 1000 metrar. Sjálvandi eru tað nøkur, sum fella frá, men vit gera nógv fyri at halda teimum til og fáa tey at trívast, segði Sigrid Dalfoss Kærbech, forkvinna í Vágs Kappróðrarfelag.

Klaksvíkar Róðrarfelag hevur fýra manningar í barnaróðrinum í summar, og fleiri eru á bíðilista. Felagið ger nógv fyri barnamanningarnar, men ansar eisini væl eftir teimum.

 - Tey eru børn, og skulu sleppa at vera børn, men annars fáa tey somu viðferð. Tey hava sama venjara og fáa somu sømdir, sum tey vaksnu eisini fáa, segði Sonja Kjølbro, sum er forkvinna.